Dy ditë para zgjedhjeve parlamentare, qeveria ka vendosur të falë të gjitha gjobat administrative të vendosura nga 1 janari 2015 deri më 30 nëntor 2024.
Vendimi u mor në mbledhjen e sotme të Këshillit të Ministrave dhe përfshin gjobat e dhëna nga një sërë institucionesh publike, si Policia e Shtetit, Policia Bashkiake, Inspektoratet Vendore të Mbrojtjes së Territorit, IKMT, AKU dhe Inspektorati Shëndetësor Shtetëror.
Sipas vendimit, brenda 30 ditësh, këto institucione duhet të dorëzojnë listat e gjobave të paekzekutuara pranë drejtorive të taksave, në mënyrë që ato të hiqen nga sistemi.
Mes gjobave që përfitojnë nga falja përfshihen edhe ato të vendosura gjatë pandemisë për shkelje të masave kufizuese, si dhe penalitetet për ndërtime pa leje në zona rurale, që kishin qëllim banimi apo bujqësor. Falja prek edhe subjektet që ushtrojnë veprimtari bujqësore dhe blegtorale në këto zona.
Nëse ndonjë individ, person fizik apo juridik vëren se gjoba ndaj tij nuk është fshirë nga sistemi, ai mund të paraqesë kërkesë pranë strukturave përgjegjëse vendore. Në rast refuzimi, i jepet e drejta për të ndjekur çështjen në rrugë gjyqësore.
