Me lot në sy dhe zë të dridhur nga dhimbja, babai i Ilarias, Flamur Sula, kërkoi drejtësi për vajzën e tij gjatë ceremonisë mortore që u zhvillua në Terni, ku mbi 3 mijë persona u mblodhën për t’i dhënë lamtumirën e fundit 23-vjeçares shqiptare.
“Ai duhet të kalbet në burg. Ne i thamë lamtumirën për herë të fundit vajzës sime Ilaria, e cila tani është lart në parajsë. Ajo nuk e meritonte këtë fund sepse ishte me të vërtetë një fëmijë i artë, një engjëll,” u shpreh i shkatërruar Flamur Sula.
Kryebashkiaku i Ternit, Stefano Bandecchi, në një fjalë prekëse për të ndjerën, tha: “Ilaria gjeti një djall në rrugën e saj, një njeri të padenjë për t’u quajtur burrë.”
Në përfundim të ceremonisë, babai i të ndjerës shtoi: “Shpresojmë që drejtësia italiane të mos na japë fjalë të kota, si falje.”
Trupi i pajetë i Ilarias u përcoll në banesën e fundit nga një turmë e madhe njerëzish, duke shndërruar varrezat e Ternit në një vend lotësh, lutjesh dhe revoltë për një jetë të marrë padrejtësisht.
