Javën e kaluar kryeministri Edi Rama deklaroi se kishte dorëzuar një draft-propozim për çështjen e Asociacionit në komunat me shumicë serbe në Kosovë.
Ditën e sotme, kryeministri i Kosovës Albin Kurti iu përgjigj draftit të Ramës për Asociacionin duke i kërkuar këtij të fundit që një draft për komunat me shumicë etnike, t’ja paraqesë presidentit serb Aleksandër Vuiçiç për Bujanocin, Medvegjën dhe Preshevën në takimin e ardhshëm të Ballkanit të Hapur.
“Nuk kam dyshim se Rama beson që propozimi i tij është i mirë dhe duke qenë kështu atëherë ajo që unë propozoj është që kryeministri Edi Rama këtë draft statut t’ja prezantojë Vuçiçit në takimin e rradhës të Ballkanit të Hapur për shqiptarët në Preshevë dhe Bujanoc. Nëse e mendon si diçka të mirë le t’ja bëjë si propozim për shqiptarët që ndodhen atje. Duke besuar në atë që beson kryeministri Edi Rama, në vend që të propozojë në Paris e Berlin, t’ja propozojë Beogradit për Bujanocin, Medvegjën e Preshevën”, deklaroi Kurti.
Vlen të theksojmë se edhe më herët zyra e kryeministrit të Kosovës ka deklaruar se nuk është dakord me draftin e propozuar nga kryeministri Rama. Në një prononcim zyrtar është deklaruar se Kosova në këtë situatë ka nevojë për mbështetje dhe jo ndërmjetësues pasi të tillë ka shumë.
