Një ngjarje e rëndë tronditi mbrëmjen e djeshme rajonin e Pordenones në Itali, ku një 43-vjeçar shqiptar, Vladimir Topjana, u ekzekutua me armë zjarri nga një bashkëkombës i tij.
Vrasja ndodhi në sy të djalit 17-vjeçar të viktimës, pranë një lokali ku kishin shkuar për të ndjekur ndeshjen mes Romës dhe Juventusit.
Ngjarja u regjistrua rreth orës 21:30 në qytezën Fontanafredda, përpara “Bar Sporting”, një lokal i frekuentuar nga tifozët e Milanit.
Sipas dëshmive, konflikti nisi jashtë lokalit, në rrugën Buonaroti, kur një “Audi” e bardhë ndaloi pranë Topjanës dhe një të afërmi të tij. Prej saj zbritën disa persona, mes tyre edhe 30-vjeçari që u identifikua më vonë si autor i vrasjes.
Debati mes palëve agravoi shpejt, duke tërhequr vëmendjen e klientëve të lokalit që tentuan të ndërhyjnë për të qetësuar situatën.
Por tensioni u zhvendos në një hapësirë mes dy bizneseve aty pranë, ku autori nxori armën dhe qëlloi tre herë në drejtim të Topjanës. Një prej plumbave e goditi në kokë, duke i shkaktuar vdekjen e menjëhershme.
Autori tentoi të largohej me shpejtësi nga vendngjarja, por u arrestua nga policia italiane disa orë më vonë, në zonën e Orsagos. Motivet e konfliktit ende nuk janë bërë të ditura nga autoritetet.
Viktima, Vladimir Topjana, jetonte në Cordenons me familjen e tij dhe punonte si shofer. Ai njihej si person i qetë dhe e frekuentonte shpesh zonën ku ndodhi ngjarja, për shkak të lidhjeve familjare. Policia po vijon hetimet për të zbardhur plotësisht rrethanat dhe shkaqet e kësaj vrasjeje tragjike.
