Kreu i Partisë Demokratike, Lulzim Basha ka shkarkuar nga posti i Nënkryetarit të Komisionit të Sigurisë Flamur Nokën. Noka është paralajmëruar gjithashtu për përjashtim nga Grupi Parlamentar.
Në një njoftim për mediat, PD bën me dije se arsyeja e vendimit është prodhimi i gënjeshtrave për të baltosur partinë dhe kryetarin, duke sajuar diskutime të paqena në mbledhjen e kryesisë.
NJOFTIM PER SHTYP I PARTISE DEMOKRATIKE
Sot Kryetari i PD Lulzim Basha i ka komunikuar shkarkimin nga funksioni i Nënkryetarit të Komisionit të Sigurisë Flamur Nokës, si dhe e ka paralajmëruar për përjashtimin e tij nga Grupi Parlamentar.
Arsyeja e këtij vendimi është shndërrimi i mbledhjes së Kryesisë së Grupit në laborator të prodhimit të gënjeshtrave për të baltosur Kryetarin dhe Partinë Demokratike, duke sajuar diskutime apo qëndrime, të pathëna dhe të paqena. Këto shpifje dhe sajesa të herëpashershme dhe të përsëritura, dëmtojnë interesin e Partisë Demokratike dhe të demokratëve, duke shfokusuar vëmendjen e betejës së opozitës ndaj të vetmit kundërshtar që është armiku i Shqipërisë dhe shqiptarëve Edi Rama.
Ditën e sotme, Flamur Noka deklaroi se askush nuk ka guxuar ta quajë llum bazën e PD-së, duke i referuar deklaratave që sipas tij ishin bërë nga Basha.
“As armiqtë më të egër nuk i kanë konsideruar llum, po përmbushen foltoret, kjo forcë duhet ti rikthehet betejës me Ramën dhe jo të rrijë me kthetrat e Ramës. Veç Basha e quan llum anëtarësinë e PD”, tha Noka.
