Një ngjarje e rëndë dhune ka ndodhur në Sarandë, ku një nënë dhe djali i saj janë rrahur brutalisht nga disa persona. Policia ka bërë të ditur se autorët janë identifikuar dhe arrestuar, ndërsa viktimat ndodhen jashtë rrezikut për jetën.
Incidenti u shënua në një parkim në lagjen nr. 4, ku gjashtë persona u përfshinë në një konflikt të dhunshëm. Sipas hetimeve, N.A. dhe E.A. u goditën me grushte, shkopinj dhe sende të forta, duke marrë plagë të shumta. Ata u dërguan me autoambulancë në spitalin e Sarandës, ku po marrin trajtim mjekësor.
Fillimisht u shoqëruan katër persona, por në vijim policia arrestoi në flagrancë dy prej tyre: vëllezërit Romeo Laze, 45 vjeç, dhe Fabion Laze, 39 vjeç. Ata akuzohen për “plagosje të rëndë me dashje në bashkëpunim”.
Dy vëllezërit janë të njohur për precedentët e shumtë penalë në Sarandë. Në vitin 2011 u akuzuan për plagosjen e dy vëllezërve Avdiu. Në vitin 2014, Fabion Laze u arrestua për “prodhim dhe shitje të lëndëve narkotike”, ndërsa në vitin 2015 Romeo Laze për “dhunë në familje” dhe “dëmtime të tjera me dashje”.
Në vitin 2021, Romeo u arrestua sërish për trafik droge, ndërsa në shkurt të vitit 2025 Prokuroria e Sarandës sekuestroi ndaj tij dhe familjarëve dy pasuri, dy automjete dhe një biznes. Fabion Laze, nga ana tjetër, ka pasur precedentë penalë edhe jashtë vendit në fushën e narkotikëve.
Policia vijon hetimet për zbardhjen e plotë të ngjarjes.
