Pas dhunës të ushtruar ndaj kolegëve të tyre, mjekët e spitalit të Shkodrës, por edhe ata të QSUT-së kanë dalë edhe sot në protestë.
Në Shkodër puna në spital është ndërprerë përkohësisht, në shenjë solidarizimi, pas rasteve të fundit të dhunës ndaj bluzave të bardha
Ndërsa në Tiranë, protestës iu bashkua edhe zv/ministria e Shëndetësisë Mira Rakacolli.
Mjeku Tritan Kalo ka kërkuar ndërhyrje për të marrë të gjitha masat në mbrojtje të mjekëve dhe të bluzës së bardhë, që është e shenjtë.
“Mos harroni që në 1997 kur tërë shteti u shkërmoq ishin mjekët ata që qëndruan gati për të ofruar ndihmë. Nuk i keni nga mjekët problemet, nuk jeni të varfër nga mjekët, e nëse flitet që për ata që shkelin barin në fushën e futbollit të dënohen 3 vjet, ata që dhunojnë mjekët e kanë pak edhe 30 vjet”- tha ai.
Edhe ditën e djeshme ata protestuan, duke deklaruar se ndihen të kërcënuar për jetën dhe në presion gjatë ushtrimit të detyrës, ndaj kërkuan siguri fizike në punën e tyre.
Rasti i fundit në QSUT ishte ushtrimi i dhunës ndaj mjekes specializante që ndodhi javën e kaluar.
Një tjetër problematikë që ngrejnë mjekët specializantë është edhe mungesa e pagësës për periudhën katër vjeçarë të specializimit.
