Vetëm pak ditë më parë, Raphael Dwamena, futbollisti i ekipit të Egnatias ndërroi jetën në moshën 28-vjeçare nga një sulm kardiak, të cilin e pësoi në fushën e lojës.
Kjo tragjedi është ende thuajse e pabesueshme si për tifozët, lojëtarët dhe drejtuesit e Egnatias por jo vetëm, humbja e futbollistit është e pabesueshme për të gjithë.
Së fundmi, “Panorama Sport” ka zbuluar detaje të reja nga lufta për jetë e lojtarit ganez, teksa po traspotohej në ambulancë për në spitalin e Kavajës. Ai ka pësuar aktak kardiak edhe në ambulancë, ku dha frymën e fundit, pa arritur në spital.
“Mjekët, pasi vepruan menjëherë, konstatuan që Dwamena kishte puls, duke dhënë shenja jete. Në këtë gjendje është futur në ambulancë, ndërsa pas pak çastesh, ka mbyllur sytë duke pësuar një gjendje të fikëti. Mjekët konfirmuan se përtej kolapsit, futbollisti kishte ende parametra jetësore. Në ambulancë ka pasur të gjitha pajisjet dhe medikamentet e nevojshme, teksa gjatë rrugës për në spital, Duamenës i është injektuar adrenalinë dhe proceduar me defribilatorin me goditje elektrike.
Teksa ambulanca po shkonte në kohë rekord drejt spitalit të Kavajës, zemra e ganezit pushoi së rrahuri. Mësohet se rreth orës 14:01, lojtari kishte pësuar një tjetër goditje në zemër dhe në atë moment ka ndërruar jetë. Dwamena ka mbërritur në orën 14:10 në spitalin e Kavajës, por pa shenja jeta, pavarësisht ndërhyrjes së shpejtë të mjekëve”, shkruan Panorama.
