Agjentët e Byrosë Kombëtare të Hetimit kanë ndërmarrë një operacion në Elbasan, duke ushtruar kontrolle në zyrat e një kompanie ndërtimi me lidhje të dyshuara me grupin e Suel Çelës.
Operacioni zhvillohet në kuadër të hetimeve që po kryen SPAK për tenderë të dyshuar si të paligjshëm, të dhënë nga disa bashki të Qarkut të Elbasanit.
Kontrollet nisën herët në mëngjes dhe u shtrinë edhe në banesën e drejtorit të Ujësjellësit. Në ambientet e biznesit janë sekuestruar pajisje elektronike, përfshirë celularë, kompjuterë dhe dokumentacion që lidhet me aktivitetin financiar dhe tenderët e fituar.
Prokuroria e Posaçme është duke hetuar një seri kompanish ndërtimi me aktivitet në Elbasan, Tiranë dhe Durrës, të dyshuara për përfshirje në korrupsion dhe shkelje të procedurave të prokurimeve publike. Kontrollet janë kryer nga BKH-ja me mbështetjen e forcave të policisë.
