Ka dështuar seanca e kësaj të hëne në Gjykatën e Posaçme në ngarkim të ish-kryebashkiakut të Durrësit, Vangjush Dako dhe të pandehurve të tjerë. Seanca u shty në datë 19 korrik ora 12:30. Shkak për këtë shtyrje është bërë mungesa e avokatit Hanza Reka. Ky i fundit paraqiti kërkesë në sekretarinë e gjykatës përmes klientes së tij, për shtyrjen e procesit në një datë tjetër me argumentin se ndodhet jashtë territorit të vendit.
Për çfarë akuzohet Vangjush Dako?
Vangjush Dako, ish kryebashkiaku i Durrësit u arrestua më 6 qershor me urdhër të Prokurorisë së Posaçme kundër Korrupsionit dhe Krimit të Organizuar me dyshimet se ka shpërdoruar detyrën në dy raste. Rasti i parë ka të bëjë me dhënien e një leje ndërtimi në 2011 për një pallat, në lagjen nr 5, në qendër të Durrësit që u dëmtua nga tërmeti i 2019-ës. Pasi verifikimeve dyshohet se pallati kishte 4 kate pa leje dhe legalizimi i godinës është kryer në shkelje të ligjit.
Rasti i dytë ka të bëje me një kallëzim për tenderin e shëtitores që sipas Kontrollit të Lartë të Shtetit dëmi llogaritej në 18 milionë lekë. Gjithsej bashkë me Dakon u lëshuan 10 urdhër arreste, 7 prej të cilave me arrest në burg dhe 3 në arrest shtëpie.
