Ish-deputetja e PS, Arta Dade, ka bërë mbrëmjen e sotme disa deklarata të papritura për partinë që dikur përfaqësonte.
Në një intervistë për “Tempora”, Dade tha se Rilindja nuk ka asnjë lidhje me atë çfarë përfaqëson Partia Socialiste, duke u shprehur se ajo që ndodhi në Komisionin e Sigurisë, ku një Drejtor i Përgjithshëm i Policisë, i mbylli gojën deputetëve, ndërsa sulmonte një familje, tregon se ata deputetë atje s´kanë kurajo.
“Imagjinoni pak këta deputetë që s´kanë kurajo të reagojnë ndaj një Drejtori Policie, si qëndrojnë përpara kryeministrit. Ne nuk jemi në atë kohë dhe policia është trajnuar, por shikoni se çfarë ndodhi. Është e turpshme qoftë ai sulmi që Drejtori i Përgjithshëm i Policisë i bëri një familjeje, ashtu edhe heshtja e deputetëve, që janë kthyer thjesht në zëdhënësa të Kryeministrit”, tha Dade.
Dade u shpreh se asnjë prej deputetëve nuk ka sot tagër që të marrë një vendim pa marrë lejen e kryeministrit, teksa shtoi se ndërsa njerëzit ndodhen në çadra, që prej tërmetit të 26 nëntorit, ministri Arben Ahmetaj, thotë se do nxjerrim nga dheu lekët për Teatrin e ri.
Ish-deputetja nuk la pa përmendur as kreun e PS, kryeministrin Edi Rama, për të cilin u shpreh se edhe punët që ka bërë si kryebashkiak i ka bërë me kryeministrat socialistë, Pandeli Majko, Ilir Meta dhe Fatos Nano.
“Rilindja dështoi dhe Rama iu kthye Partisë Socialiste. Edi Rama edhe punët që ka bërë si kryebashkiak i ka bërë me kryeministrat socialistë, Pandeli Majko, Ilir Meta dhe Fatos Nano. Rama pasi krijoi këtë grupimin e MJAFT, një miku i tij i tha që ti që do të bëhesh kryeministër i Shqipërisë nuk mund të bëhesh me këto çupëlina. Atëherë, Rama mori PS, Mjaft u transformua në G-99 dhe nën okelion e Rilindjes, u përfshinë në PS”, tha Dade.
