Akuza të ndërsjella midis partive, që kërkojnë me çdo kusht t’a depolitizojnë demonstratën kundër dhunës së policisë , që i mori jetën një 25 vjeçari. Teksa LSI-ja ishte prezente me ish-deputetët e saj, Floida kërpaçi dhe Përparim Spahiu, në protestën e ditës së pestë, Partia Demokratike e cilëson atë paqësore.
Nëpërmjet numrit 2, Sekretarit të Përgjithshëm Gazment Bardhi, protestën e dejshme PD e cilëson si një protestë model.
“Një protestë model, paqësore dhe që mori duartrokitjen e qytetarëve që ndaluan makinat e tyre në trafikun e Tiranës gjatë kohës së marshimit drejt Drejtorisë së Policisë. Kaq ka mjaftuar dhe mbështetja e qytetarëve të Tiranës e tërboi sot Edi Ramën, duke i rrëzuar cilësimin 4 ditor , që i bënte të rinjve shqiptarë si “huliganë”dhe “të blerë”, tha Bardhi.
Dhunën po e nxit Edi Rama. Arsyeja e vetme është frika që tashmë shumica e shqiptarëve nuk e pranon dhe po kundërshton arrogancën, dhunën dhe keqqeverisjen e tij 7- vjeçare. Ai është frymëzuesi dhe autori i shndërrimit të Policisë së Shtetit në një bandë që lufton qytetarët. Që pasi të vret, të pengon edhe të protestosh”, shkruan Bardhi.
Ndërkaq, kryetari i Forumit Rinor të Partisë Demokratike, Belind Këlliçi në një intervistë telvizive tha se policia duhet të ristrukturohet, duhet të heqë dorë nga dhuna ndaj protestuesve dhe nga ana tjetër qeveria të mbajë përgjegjësi, ndërkohë që theksoi se të rinjtë po provokohen nga policia me persona të infiltruar për t’ia faturuar më pas zhvillimin e ngjarjeve partive politike.
Për këtë kryetari i FRPD-së theksoi se protestat në Tiranë janë organizuar nga të rinjtë dhe jo nga partitë. I pyetur rreth komenteve dhe akuzave se “opozita ka paguar minorenë” Këlliçi u shpreh i revoltuar se “e neveriste këtë akuzë”.
“E neveris! Është akuzë qesharake dhe e paimagjinueshme që në vend që Kryeministri të mbajë përgjegjësi…,” – u shpreh Këlliçi.
Për sa i përket dhunës, së shfaqur sidomos në Shkodër ndaj zyrës së Partisë Socialiste, Këlliçi tha se ato ngjarje kanë ndodhur nga “persona të infiltruar”.
“Kemi qenë të parët që kemi thënë se janë persona të infiltruar nga ana e pushtetit, nga ana e PS-së, sepse kujt i intereson të djegë selitë e PS-së, për ne s’kanë asnjë rëndësi, s’janë objekte të rëndësisë së veçantë ku të rinjtë të shfrynë dufin e tyre, sepse sot që flasim e gjithë PS-ja është në institucionet publike, Kryeministri, ministri… dhe e kemi parë se çfarë i kanë bërë këtyre institucione ata,” – u shpreh Këlliçi duke dënuar edhe përpjekjen, që sipas tij, po bëhet për të manipuluar ngjarjet qoftë këtu edhe me vrasjen e Rashës.
/GazetaReforma.com/
