Një 22-vjeçare shqiptare ka dalë para gjykatës britanike, pasi kishte rënë në prangat e policisë në korrik të vitit që lamë pas.
Ajo u ndalua teksa udhëtonte në një makinë me një irlandez dhe 4 shqiptarë të tjerë.
Ina Bufi u dha Forcave Kufitare në Portin Holyhead një kartë identiteti greke, e cila rezultoi të ishte false.
22-vjeçarja vijonte të këmbëngulte për të kundërtën, derisa në një moment tjetër ndryshoi version duke thënë se ishte pré e trafikimit të qenieve njerëzore.
Pas hetimeve të kryera nga Gjykata britanike, rezultoi se ajo po gënjente dhe pretendimet e saj ranë poshtë.
Gjykata ka vërtetuar se Bufi ka hyrë ilegalisht në Britani dhe nuk posedonte asnjë dokument.
Së fundmi, mediat vendase bëjnë me dije se e reja u paraqit ditën e sotme para Gjykatës së Kurorës në Caernarfon, ku u dënua me një vit burg për “posedim të dokumentave false”.
Gjykatësi gjithashtu urdhëroi që dokumentet e rreme të konfiskohen dhe shkatërrohen.
