Ditën e sotme Kuvendi është mbledhur në një seancë të jashtëzakonshme, ku pritet të votohen edhe disa ndryshime në projektligjin për COVID-19.
Nga salla, ministrja e Shëndetësisë, Ogerta Manastirliu, bëri me dije se deri më sot numërohen 518 të prekur nga COVID-19.
“Sot rezultojnë të infektuar 518 persona në total. Në 24 orët e fundit janë shënuar 24 rastë të reja. Sot Shqipëria ka mbi 4500 testime. Mbi 800 testime janë kryer për personelin mjekësor dhe fatmirësisht më pak se 9% e personelit mjekësor kanë rezultuar pozitiv. Aktualisht kemi vetëm 14 % të kapaciteteve të spitalit të zënë. Nuk kemi pasur asnjë mungesë në terapitë apo në mjetet e nevojshme. Lajmi i mirë është që numri i të shëruave sa vjen e shtohet. Në dy spitalet Covid në vend vetëm 14% e kapacitetit janë të zënë, kemi aktualisht 12 pacientë në terapi intensive dhe 4 në intubim. Nuk kemi asnjë mungesë në mjekim dhe logjistikë, ndërkohë që vazhdojmë punën me intensitet në terren. Në 40 ditë kemi sheshuar kurbën, kemi gjurmuar rastet dhe kemi trajtuar cdo rast, puna në terren nuk po ndalet,”– tha Manastirliu.
Manastirliu shtoi, se gjysma e personelit mjekësor të prekur janë shëruar.
Më tej ajo tha se numri i të shëruarve e ka kaluar numrin e të infektuarve aktiv.
“Numri i të shëruarave e ka kaluar numrin e të infektuarve aktiv. E di që nuk është koha për bilanc, se lufta nuk ka mbaruar, por në këto 40 ditë nën masa të rrepta kemi arritur të zbusim kurbën epidemike”, shtoi ajo.
