Coronavirusi vijon të përparojë me shpejtësi, teksa deri më tani janë regjistruar 3200 viktima dhe afro 93.129 të infektuar në gjithë botën.
Në Itali, e konsideruar ndryshe edhe si vatra e COVID-19 në Europë, numri i viktimave ka shkuar në 79 dhe numri i të infektuarve në mbi 2.200.
Po ashtu, Greqia ka mbyllur 28 shkolla, ndërsa rastet po shtohen me shpejtësi edhe në SHBA, ku Trump po merr masa të forta.
Në një kohë kur është prekur një numër shumë i madh shtetesh, vendi ynë nuk ka regjistruar ende asnjë rast, ndërsa të dyshuarit kanë rezultuar negativ.
Së fundi, raportohet se dy zyrtarë në Bruksel kanë rezultuar të infektuar me Coronavirus dhe nuk dihet ende nëse në institucion ka persona të tjerë të prekur.
Njëri nga të infektuarit punonte për Agjencinë Europiane të Mbrojtjes në kryeqytetin belg dhe sapo ishte kthyer nga një takim në Itali, ndërsa zyrtari tjetër është pjesë e Këshilli të Bashkimit Europian, por nuk bëhen me dije detaje të tjera.
Si rezultat, janë pezulluar të gjitha takimet e parashikuara, me qëllim shmangien e kontakteve, deri në 15 mars.
Disa ditë më parë edhe Komisioni i Venecias anuloi sesionin e 20-21 marsit, në Shqipëri.
Në këtë sesion Komisioni i Venecias do të publikonte dy raporte për Shqipërinë, mbi emërimet e gjyqtarëve në Gjykatën Kushtetuese dhe për paketën ligjore anti-shpifje.
Nga ana tjetër, OBSH ka njoftuar se ka një mungesë globale pajisjeve mjekësore, ndërsa Banka Botërore ka dhuruar 12 miliardë dollarë në ndihmë të zhdukjes së Coronavirusit.
