Në një kohë kur Coronavirusi ka pushtuar të gjithë botën, duke përparuar me shpejtësi të madhe, nga ana tjetër e medaljes ditën e sotme janë ngjallur shpresa për shërimin nga Coronavirusi.
Kjo pasi pacienti i parë i infektuar në Spanjë, Miguel Angel Benitez është shëruar pas përdorimit të medikamenteve kundër HIV dhe sklerozës.
62-vjeçari u trajtua me medikamente kundër HIV-AIDS, të quajtur ‘Kaletra’, që përdoren prej rreth 10 vitesh për pacientët dhe parandalojnë virusin të shumëfishohet në gjak.
Megjithatë, ende nuk është zyrtarizuar asgjë, pasi nuk dihet nëse kjo kurë do funksionojë me të gjithë.
Ndërkohë nga të dhënat e publikuara së fundmi rezulton se në Itali numri i të infektuarve ka shkuar në 3,858, ndërsa numri i personave që kanë ndërruar jetë që nga dita e djeshme ka shkuar në 148, pra 41 persona më shumë janë ndarë nga jeta brenda ditës.
Po ashtu, Britania e Madhe ka regjistruar ditën e sotme rastin e parë fatal si pasojë e Covid-19, ndërsa në SHBA janë regjistruar 22 raste të reja.
Në rang global numri i të infektuarve ka shkuar në 97 mijë, ndërsa janë regjistruar më shumë se 3300 viktima.
Fatmirësisht, në vendin tonë nuk është shënuar asnjë person i prekur nga virusi, teksa mbi 40 raste të dyshuara kanë rezultuar negativ.
