Britania është duke kërkuar kohë për Brexit, por mesa duket BE nuk është në të njëjtin mendim dhe ka vendosur kushte për këtë kërkesë.
Sipas Presidentit të Këshillit Evropian, Donald Tusk, BE do ta pranojë shtyrjen e datës së BREXIT vetëm nëse Parlamenti Britanik do të miratojë marrëveshjen aktuale javën e ardhshme.
Tusk, ka thënë se mundet të ketë një shtyrje të shkurtër të kërkuar nga May përmes një letre të dërguar atij, ku si motivacion ka qenë se duhet më shumë kohë që të miratohet plani i saj në Parlamentin Britanik.
May ka kërkuar kohë deri në 30 qershor, ndërkohë që data përfundimtare e përcaktuar për BREXIT ka qenë 29 marsi.
Tusk ka thënë se beson që të 27 vendet anëtare të Bashkimit Evropian, do të pajtohen për shtyrje nëse Parlamenti britanik voton në të mirë të marrëveshjes së kryeministres May.
Megjithatë mesa duket nga çfarë presidenti i KE i ka thënë medias është një çështje e hapur për diskutim dhe më vonë do vendoset.
Parlamenti britanik tashmë është i ndarë dhe nuk dihet nëse do të pranojë ose jo marrëveshjen edhe pse në shumicë janë për një rirregullim të saj.
Problemi më i madh qëndron tek kufizimi me Irlandën dhe ndikimi që ky i fundit mund të ketë në ekonomi.
