Ditën e sotme GJKKO ka shtyrë pretencën për ish-ministrin e Mbrojtjes, Fatmir Mediun, ku shkak është bërë mungesa e dy prokurorëve, Altin Dumani dhe Arben Kraja.
Ndërkohë që një nga familjarët e viktimave të Gërdecit ka reaguar ashpër në lidhje me këtë vendim. Zamira Durda, e cila humbi djalin e mitur nga shpërthimi në Gërdec, i ka kërkuar sot gjyqtares së çështjes vendimin e zbardhur për këtë çështje dhe që të bëhet palë në proces. Durda thekson se ka 15 vite që endet dyerve të gjykatave.
“Dua drejtësi për djalin tim. Zonja gjyqtare më jepni vendimin e zbardhur, pse nuk u pranova si palë në proces. Kam 15 vite qe endem dyerve tuaja”, u shpreh Zamira Durda në sallën e gjyqit. Ndërkohë që të njëjtën linjë argumenti ndoqi edhe avokati i familjes Durda, Dorian Matlija, i cili hodhi akuza ndaj Gjykatës së Posaçme, duke thënë se nuk i duan palë, pasi duan që t’i bien çështjes shkurt. Ai u shpreh se nuk ka ende një arsye përse GJKKO nuk i ka bërë palë në çështje.
Kujtojmë që më 15 mars, 2008 rreth orës 12:05 ndodhi tragjedia e “Gërdecit” ku si pasojë e një shpërthimi të fuqishëm në një “fabrikë” për demontimin e armëve humbën jetën të paktën 26 persona.
