Gjatë prezantimit të Projekt-Buxhetit të vitit 2022 për arsimin, ministrja Evis Kushi bëri më dije se gjatë mandatit të tretë synimi është rritja më 32% e pagave të mësuesve. Ajo u shpreh se një pikë e rëndësishme në projektbuxhetin e vitit 2022 është edhe përmirësimi i infrastrukturës mësimore në të gjitha shkollat e vendit.
PD ka reaguar në lidhje me projektbuxhetin e prezantuar nga qeveria duke thënë se në 8 vite vetëm e ka shkatëruar arsimin.
Ina Zhupa me anë të një deklaratë në Facebook shprehet se Rama është kryeministri me aktet më antikombëtare për sa i përket arsimit.
Më tej, Zhupa përmend faktin që rritja e rrogave të mësuesve me 40% premtohet çdo fillim mandati, por paga realisht është rritur vetëm me 10 mijë lekë të vjetra në 8 vite.
Deklarata e plotë:
“Flasin për arsimin sikur kanë ardhur sot në pushtet ndërkohë në 8 vjet vetëm e kanë shkatërruar atë! Rama është kryeministri me aktet me antikombëtare përsa i përket arsimit.
Kanë kthyer mësuesit në patronazhistë dhe shkollat në shkolla partie ku drejtojnë militantë dhe jo profesionistë.
Nuk kanë mbajtur asnjë premtim, as për tekstet shkollore që janë objekt talljesh në rrjetet sociale. As për trasportin e nxënësve dhe mësuesve që janë objekt i peticioneve dhe ndonjëherë edhe shkak për mos shkollimin e fëmijëve shqiptare. Dhe as për trajtimin psiko-social, as për sigurinë në shkolla që ngjarjet tragjike edhe të fundit e konfirmojnë fare mirë!
Premtimin e rritjes së pagës e ricikluan edhe sot nga goja e kryeministrit. Kur paga është qesharake! Kanë premtuar cdo fillim mandati që do e rrisin me 40% si fjalimi i ish ministres Nikolla ne 12 shtator 2017 dhe e kanë rritur realisht vetëm 10 mijë lek te vjetra në 8 vjet.
Asgjë nuk kanë bërë dhe nuk kanë ndermend të bëjnë për arsimin! Gjithë synimet e shfaqura në buxhetin 2022 janë asgjë më shumë se një operacion copy-paste i premtimeve të pambajtura këtyre 8 viteve të shkuara!”
