Përveç vendit tonë, shqiptarët kanë arritur të depërtojnë edhe në vende të tjera të botës, ndër to edhe Britania e Madhe, ku Ministria e Drejtësisë ka publikuar statistikat për numrin e të burgosurve nga ku rezulton se shqiptarët janë nacionaliteti i parë me më shumë të burgosur krahasuar me nacionalitetet e huaja.
Referuar të dhënave të raportit, numri i shqiptarëve në burgjet britanike është rritur 4-fish në raport me vitin 2013, duke përbërë një të dhjetën e personave me shtetësi të huaj në Angli dhe Uells.
Numri shqiptarëve në Angli për herë të parë mbërriti në 999 pasuar nga polakët 835, rumunët 806, irlandezët 721 dhe xhamajkanët 440.
Por, cila është vepra penale më e përhapur?
Pjesa më e madhe e shqiptarëve vuajnë dënimin për trafik droge, kryesisht të kokainës, megjithatë, vitet e fundit është shtuar shumë edhe numri i atyre që burgosen për trafik kanabisi në shtëpi.
Në raportin e NCA të vitit 2017 mbërrihej në përfundimin se “grupet kriminale shqiptare kanë krijuar tashmë një profil e influencë të lartë në krimin e organizuar në Mbretërinë e Bashkuar”.
Bëhet me dije se çështja e krimit shqiptar dhe trafikimit të njerëzve drejt Britanisë së Madhe është diskutuar deri nga deputetë të parlamentit britanik, ku deputeti konservator Philip Hollobone ka thënë se importi i klandestinëve shqiptarë drejt Britanisë është “skandal i radhës i shtetit britanik”.
