Deputeti i Partisë Socialiste, Erjon Braçe gjatë seancës së mbajtur nga Komisioni i Ekonomisë ka bërë një propozim lidhur me investimet e parashikuara dhe buxhetin e Ministrisë së Shëndetësisë dhe Mbrojtjes Sociale për vitin 2024.
Braçe ka bërë thirrje përfaqësuesve të ministrisë së Shëndetësisë që të parashikojnë në buxhet, një raport të paguar për gratë një herë në muaj sa herë ato kanë ciklin menstrual.
“A ka mundësi që grave dhe vajzave tu njihet periudha e ciklit si periudhë sëmundjeje dhe e paguar si raport nga buxheti i shtetit sepse realisht po e konsiderojnë sëmundje lart e poshtë. Është mirë që një iniciativë të tillë që nuk kushton shumë, por që duhet kalkuluar, të përfshihet në iniciativat e ministrisë suaj”, tha Braçe.
Ai shtoi se është e rëndësishme që paketa higjeno-sanitare për periudhën e ciklit të përjashtohet nga TVSH-ja.
“A ka mundësi që paketën higjeno sanitare të grave dhe vajzave për ciklin ta përjashtojmë nga TVSH se nuk i shton asgjë buxhetit të shtetit. Nuk po kërkoj atë që po ndodh në Europë që ta paguajë qeveria njëherë në muaj, por minimumi kërkoj që të përjashtohet nga TVSH-ja”, shtoi ai në këtë mbledhje të Komisionit që po zhvillohej online.
