Rama sfidon edhe Pinokun: Pretendimet për dhunë ndaj studentëve qenkan “djallëzore”!

Asnjë surprizë më nga Edi Rama. Kryeministri që paradite kërcënon shqiptarët me heqjen e shërbimeve shtetërore, ndërsa në mbrëmje u jep leksione për lirinë dhe dialogun, ka prodhuar një tjetër deklaratë që vështirë se mund të merret seriozisht pa një dozë të konsiderueshme ironie.

“Çdo pretendim për dhunë ndaj studentëve është djallëzor.”

Po, kështu deklaroi kryeministri i Shqipërisë, ndërkohë që prej ditësh rrjetet sociale janë mbushur me pamje të ndërhyrjeve të dhunshme të policisë ndaj të rinjve protestues.

Me sa duket, pamjet nuk mjaftojnë. Dëshmitë nuk mjaftojnë. As denoncimet nuk mjaftojnë. Për Ramën, problemi nuk është çfarë ka ndodhur në rrugët e Tiranës, por kush guxon të flasë për të.

Gjatë udhëtimit drejt Budvës, ku do të marrë pjesë në Samitin e Procesit të Berlinit, Rama zhvilloi një bisedë virtuale me një student protestues dhe deklaroi:

“Dua dialog me këdo që beson që jam i keq, por dhuna është armik i lirisë së të gjithëve. Policia u qëllua me gurë, me zjarr, saçme e llastiqe primitive, me shkop e plumb gome, mjete të çdo vendi demokratik. Policët e plagosur janë dyfishi i protestuesve të lënduar. Çdo pretendim për dhunë ndaj studentëve është djallëzor. Kam publikuar një reflektim të tërë për flamingot, pasi i kam analizuar. Sot, ndër të tjera, rezultat i reflektimit është Flamingo Mirror.al.”

Nga dhuna policore te flamingot, brenda së njëjtës deklaratë. Një kalim që vetëm kryeministri mund ta shpjegojë.

Ndërkohë, pamjet e shpërndara publikisht kërkojnë verifikim dhe përgjegjësi. Madje, janë raportuar edhe pezullime efektivësh për përdorim të tepruar të forcës. Por Rama nuk pret përfundimet e hetimeve. Ai e ka gati përfundimin: çdo pretendim është “djallëzor”.

Pinoku të paktën kishte një problem me hundën sa herë gënjente. Kryeministri ynë nuk ka nevojë as për këtë efekt special. I mjafton një kamera dhe një tjetër monolog.

Ironia bëhet edhe më e rëndë kur kujton se vetëm pak orë më parë Rama paralajmëroi se familjeve të të miturve që shkaktojnë dëme do t’u mohohen shërbimet shtetërore, ndërsa personave të identifikuar si të dhunshëm do t’u kufizohet aksesi në aeroporte, trena e hotele.

Pra, kryeministri që paralajmëron kufizimin e të drejtave të qytetarëve, tani na shpjegon se dhuna është armiku i lirisë.

Madje pretendon se prej 12 qershorit ua ka zgjatur dorën studentëve për dialog dhe se për katër muaj i ka dëgjuar më shumë se kushdo.

Çfarë dialogu është ky ku qytetarët denoncojnë dhunën, ndërsa kryeministri i quan pretendimet e tyre djallëzore? Ku të rinjtë kërkojnë përgjigje, ndërsa ai u flet për flamingot?

Në gjithë këtë histori, problemi nuk është më mungesa e deklaratave të Ramës. Është teprica e tyre dhe kontradikta mes asaj që thotë sot e asaj që ka thënë vetëm disa orë më parë.

Një kryeministër nuk mund t’i shpallë të pavërteta denoncimet për dhunë policore vetëm sepse nuk i pëlqejnë. Për këtë ekzistojnë provat, hetimet dhe drejtësia.

Por derisa të flasin institucionet, shqiptarëve u mbetet të dëgjojnë reflektimet e radhës mbi flamingot. Sepse për pamjet e protestave kryeministri paska arritur në përfundim, ndërsa për shpendët ka ende shumë për të analizuar.