Kreu i Partisë Demokratike, Sali Berisha, dha sot një deklaratë për mediat nga selia blu, ku u ndal te projektligji për Paqen Fiskale, të cilin e cilësoi si një instrument për të legalizuar paratë e aktivitetit kriminal. Berisha tha se iniciativa përbën një amnisti për pastrimin e parave të drogës për kartelet shqiptare dhe bashkëpunëtorët e tyre në Amerikën Latine.
Në deklaratën e tij, Berisha u shpreh: “Edi Rama, zëdhënës kryesor në Europë i karteleve të drogës në Shqipëri dhe Amerikën Latine, me të ashtuquajturën Paqe Fiskale, ka sanksionuar amnistinë për paratë e drogës, krimit, jo vetëm të karteleve të fuqishme shqiptare të kokainës dhe kanabisit, por edhe ortakëve të tyre në Amerikën Latine. Një ligj, të cilin qeveria e SHBA, BE, por edhe vendet e tjera partnere, e kundërshtuan në mënyrën më të prerë para dy vitesh, Edi Rama e ka votuar në parim në parlament.”
Sipas tij, ky akt përbën “mbështetjen publike më të fuqishme që Ramaduro, shefi i narkoshtetit të parë dhe të vetëm në Europë, u bën karteleve shqiptare të drogës dhe ortakëve të tyre në Amerikën Latine.”
Berisha shtoi se Partia Demokratike dhe deputetët e saj në komisionet përkatëse kanë mbajtur qëndrime të qarta kundër projektligjit, duke propozuar amendamente që, sipas tij, nuk janë marrë në konsideratë nga mazhoranca. Ai theksoi se për PD-në kjo nismë krijon një mundësi ligjore për pastrimin e parave nga klanet e drogës dhe krimit, për thellimin e evazionit fiskal dhe shmangien e detyrimeve të ardhshme ndaj shtetit.
Deklarata e Berishës vjen ndërsa projektligji për Paqen Fiskale ka kaluar në parim në Parlament, duke vijuar të ngjallë debate të forta politike.
