Ditën e sotme presidenti i sapo zgjedhur i Shqipërisë, Bajram Begaj, ka kryer një takim me me tre nga ish-Presidentët e Republikës. Pjesë e takimit mësohet të ketë qenë Alfred Moisiu, Bamir Topi dhe Rexhep Meidani. Ai u zhvillua në “Pallatin e Brigadave”, dhe zgjati për rreth 1 orë e 30 minuta. Nuk dihet ende se për çfarë është biseduar brenda mureve të Pallatit të Brigadave, por mendohet se Begaj ka marrë këshilla nga paraardhësit e tij për drejtimin e shtetit. Duket se pasi u betua si president i Republikës, Bajram Begaj nuk po humbet kohë, duke zhvilluar kështu takime për të marrë këshilla nga ish-krerë të shtetit shqiptar. Në përfundim të takimit ish-presidentët u shoqëruan nga makinat e Gardës së Republikës. Këto takime vijnë disa ditë para se Bajram Begaj të marrë detyrën. Ky i fundit u propozua nga Partia Socialiste, do të jetë pasardhësi i Ilir Metës duke qëndruar në krye të shtetit për pesë vitet e ardhshme. Ai u zgjodh nga parlamenti me 78 vota pro, 4 kundër dhe 1 abstenim, duke marre edhe një votë nga opozita, ndërsa Berisha dhe Alibeaj e bojkotuan votimin. Për zgjedhjen e tij si president ka pasur disa reagime nga analistë dhe politikanë , ndër to edhe ish-kryeministri Sali Berisha , i cili e ka cilësuar si një shkelje të kushtetutës zgjedhjen e Ish-Shefit të Shtabit të Përgjithshëm, pasi sipas tij Begaj ka qenë ushtarak aktiv, dhe nuk i lejohet të zgjidhet në detyra të tjera. Por perveç kesaj, Berisha ka komentuar edhe urimin e Presidentit të Serbisë, Aleksander Vuçiç, i cili i dërgoi një mesazh urimi homologut të tij shqiptar.
“Besoj gjithashtu se së bashku do të kemi sukses në zhvillimin e të gjitha potencialeve të nismës “Open Balkans”, e cila do të përmirësojë shumë standardet në rajonin tonë”. përfundonte mesazhi i Vuçiç.
Berisha e konsideron këtë si një provë që Presidenti i ri u zgjodh nga “Ballkani i Hapur”.
