Kreu i Partisë Demokratike, Lulzim Basha ka folur pas takimit që zhvilloi me zv.kryeministrin shqiptar të Malit të Zi, Dritan Abazoviç, icili ndodhet në një vizitë zyrtare në Tiranë. Basha në fjalën e tij jashtë selisë së Partisë demokratike e ka vlerësuar zv.kryeministrin Abazoviç, duke e cilësuar atë si një etalon të guximshëm. Gjithashtu Basha ka treguar se temat që ata kanë diskutuar kanë variuar nga demokracia te politikat reale si dhe integrimi në BE i dy vendeve.
“Kam një kënaqësi unike, kënaqësinë e mikpritjes së zv.kryeministrit shqiptar të Malit të Zi, Dritan Abazoviç. Karriera politike e tij është ndërtuar mbi përvojën e gjatë të një aktivisti, të një studiuesi dhe përpiluesi të tezave politike për Ballkanin, Evropën dhe globalizmin dhe është faktuar në luftën e pabarabartë midis forcave për liri dhe rrezikut të autokracisë.
Është një kënaqësi e veçantë, sepse interesi i PD dhe i imi personal për fqinjin tonë verior e në veçanti për bashkëkombasit tonë në Malin e Zi ka qenë dhe mbetet permanent, dhe gjatë bisedës së sotme konstatova se përkushtimi i Abazoviç bën diferencën e dëshiruar prej dekadash nga shqiptarët aty, por edhe nga PD qoftë në qeverisje apo në opozitë. Temat tona të diskutimit kanë variuar nga demokracia te politikat reale, zhvillimi i popujve tanë dhe integrimi në BE i dy vendeve tona. Abazoviç është një etalon i guximit”, tha kryetari i Partisë Demokratike, Lulzim Basha.
