Banka Botërore ka rritur pragun e varfërisë për vendet me të ardhura mesatare të larta, ku përfshihet edhe Shqipëria. Sipas standardit të ri, çdo person që jeton me më pak se 8.30 dollarë në ditë konsiderohet i varfër. Më parë ky prag ishte 6.85 dollarë në ditë.
Pragu i ri synon të pasqyrojë më mirë koston reale të jetesës dhe nevojat bazë ditore si ushqimi, strehimi, kujdesi shëndetësor dhe arsimi. Banka Botërore argumenton se sot shumica e popullsisë botërore jeton në vende me të ardhura mesatare dhe për këtë arsye nevojitet një standard më i lartë për matjen e varfërisë.
Për Shqipërinë, kjo do të thotë se numri i personave që konsiderohen të varfër rritet. Me pragun e mëparshëm prej 6.85 dollarësh, rreth 20 për qind e popullsisë jetonte në varfëri. Me kufirin e ri prej 8.30 dollarësh, kjo përqindje pritet të jetë më e lartë.
Ndryshimi u miratua në qershor 2025 dhe bazohet në të dhënat më të fundit mbi fuqinë blerëse. Aktualisht, linjat e varfërisë janë 3 dollarë në ditë për vendet me të ardhura të ulëta, 4.20 dollarë për vendet me të ardhura mesatare të ulëta dhe 8.30 dollarë në ditë për vendet me të ardhura mesatare të larta.
