Ministri i Brendshëm, Taulant Balla i ftuar në Komisionin për Punën, Çështjet Sociale dhe Shëndetësinë propozoi zgjerimin e listës së lëndëve psikotrope, me lëndë të tjera që janë të pranishme e kanë nisur të përdoren në vendin tonë.
Sipas Ballës duhen marrë masa parandaluese për këto lëndë shumë të rrezikshme që po përdoren nga të rinjtë.
“Shqipëria nuk është vend prodhues apo përdorues i këtyre lëndëve. Por sasitë e kapura në raste të caktuara gjatë verës tregojnë një prirje që të rinjtë mund t’i përdorin në vijim”, tha ministri. Ai tha se policia ka kapur bombola me lëndë të tilla, për të shmangur përdorimin e paautorizuar të tyre. “Në kuadër të Paketës së Sigurisë në Shkolla ne kemi patur rezultate kundër shpërndarjes së narkotikëve. Por edhe më efektive do jetë nëse krijojmë barriera të forta. Të bëhemi të gjithë bashkë, të majtë, të djathtë, shumicë e pakicë, pasi shoqëria na mirëpret duke forcuar bazën ligjore”, ishte apeli i ministrit Balla në Komisionin e Shëndetësisë.
