Ditën e sotme presidenti Ilir Meta ka mbajtur një deklaratë për mediat, ku u tregua i gatshëm ndaj të gjitha pyetjeve të gazetarëve.
Meta ka kritikuar ashpër kryeministrin Rama dhe ambasadorët të cilët po e bëjnë Shqipërinë të duket gazi i botës. Ndaj deklaratës së Metës ka reaguar edhe Kryetari i Grupit Parlamentar të Partisë Socialiste, Taulant Balla.
Ky i fundit ka reaguar nëpërmjet një postimi në rrjetin social Facebook, ku është shprehur se Partia Socialiste po pret që të votohet Komisioni Hetimor për shkarkimin e Metës.
Balla tha se kemi një president që si njeri meriton keqardhje, e ndërsa si politikan meriton injorim, por si president meriton vetëm shkarkim.
Postimi i plotë i Taulant Ballës në Facebook:
“Ne po presim të votojmë Komisionin Hetimor për shkarkimin e tij dhe do të presim pastaj raportin e Komisionit për të miratuar shkarkimin, të cilin natyrisht do ta shqyrtojë Gjykata Kushtetuese, por deri atëherë jemi të vetëdijshëm se do të kemi një President që si njeri meriton keqardhje, si politikan meriton injorim, si president meriton vetëm shkarkim! Dhe për sjelljen prej gaztori cirku sot dhe gjatë gjithë këtyre kohëve, meriton vetëm përqeshje popullore!”
