Eurovision 2025, i zhvilluar në qytetin e Bazelit, u fitua nga Austria me këngën “Wasted Love”, interpretuar nga artisti me origjinë filipinase, JJ.
Shqipëria shënoi një nga rezultatet më të mira në historinë e saj në këtë kompeticion, duke u renditur në vendin e 8.
Ky është pozicioni më i lartë që nga viti 2012, kur Rona Nishliu përfaqësoi vendin dhe u pozicionua e pesta.
Grupi Shkodra Elektronike, me këngën “Zjerm”, mori 45 pikë nga juria ndërkombëtare, me Francën që dha maksimumin, dhe plot 173 pikë nga televotimi i publikut.
Në vendin e dytë përfundoi Izraeli me 357 pikë, përfaqësuar nga këngëtarja Yuval Raphael.
Performanca e saj u shoqërua me tensione jashtë skenës, pasi në qendër të Bazelit shpërthyen protesta pro-palestineze, të cilat përshkallëzuan deri në përplasje me policinë.
Disa protestues madje tentuan të hynin në skenë gjatë interpretimit izraelit.
Vendi i tretë iu dha Estonisë, me artistin Tomy Cash që grumbulloi 356 pikë, vetëm një më pak se Izraeli, në një nga edicionet më të diskutuar të viteve të fundit.
