Kryeministri i Australisë, Anthony Albanese, njoftoi të enjten se qeveria po përgatit një legjislacion për të ndaluar aksesin e mediave sociale për fëmijët nën 16 vjeç, duke synuar të jetë ndër të parat në botë me një politikë të tillë.
Sipas tij, mediat sociale kanë një ndikim negativ mbi shëndetin mendor të fëmijëve dhe, si rrjedhojë, kërkohet marrja e masave.
Ky legjislacion pritet të paraqitet në parlament brenda vitit, dhe do të hyjë në fuqi 12 muaj pas miratimit.
Një element i rëndësishëm i ligjit është që, ndryshe nga disa rregullore të mëparshme, nuk do të ketë përjashtime për fëmijët nën 16 vjeç edhe në rastet kur ka miratim prindëror.
Përgjegjësia për zbatimin e ligjit do të bjerë mbi platformat e mediave sociale, të cilat duhet të ndërmarrin hapa për të parandaluar aksesin e të miturve, duke hequr barrën nga prindërit.
Ministrja e Komunikimit, Michelle Rowland, theksoi se legjislacioni do të përfshijë platformat kryesore, si “Instagram” dhe “Facebook” (nën Platformën Meta), “TikTok” e ByteDance, “X” e Elon Musk dhe “YouTube” e Alphabet.
