Ditën e sotme është zhvilluar mbledhja e Komisionit të Ligjeve, ku kreu i Kadastrës Artan Lame deklaroi se me ligjin e ri askush nuk nxirret nga banesa pa marrë një dëmshpërblim.
Sipas Lames ligji i ri është më social, sepse nuk nxjerrë në mes të katër rrugëve qytetarëve që kanë një shtëpi, pavarësisht se jo të legalizuar, si dhe lehtëson procedurat për përmbylljen e procesit të legalizimeve.
Qytetarët në fjalë mund të përfitojnë banesa sociale, ose mund të futen në skema të caktuara kompensimi.
“Është një sukses i qeverisë ai i legalizimeve, ndërsa shoqëria është ndërgjegjësuar, që s’mund të vazhdohet më me ndërtime të tjera pa leje. Ligji i ri lehtëson procedurat për përmbylljen e procesit të legalizimit, sigurisht në ato zona ku nuk është mbyllur. Ligji i ri thoshte se objektet që nuk legalizohen prishen, ndërsa tani zgjidhja që gjen ky ligj është sociale, askush që ka një banesë nuk mund të nxirret pa marrë një shpërblim qoftë edhe të pjesshëm. Pra, mund të përfitojnë banesa sociale, ose mund të futen në skema të caktuara kompensimi”, tha Lame.
Po ashtu, kreu i Kadastrës ka njoftuar se një proces tjetër është drejt përmbylljes- ai i regjistrimit dhe pajisjes me dokumente pronësie të objekteve të ndërtuara para vitit 1991.
“Fondi i banesës para ‘91, përfshirë banesa të 1700 apo 1800, por që s’kanë dokumente pronësie. Mjafton t’ju them këtu që në rastin e Thumanës, ato dy pallatet që u shembën, Kadastra pati shumë probleme në identifikimin e pronarëve pasi nuk ishin regjistruar në kadastër dhe ZRPP pavarësisht se kishin letra privatizimi. Janë me dhjetëra mijë pallate të tilla të privatizuara pas 91-92”.
Në draft parashikohet gjithashtu regjistrimi i pasurisë përfundimtare të tokave të marra në bazë të ligjit 7501, ndërsa në rastet kur ky ligj nuk është pranuar të zbatohet por banorët kanë ndarë kufijtë në bazë të ligjit të vjetër do të mund të marrin tapitë.
Nga zbatimi i ligjit do të përjashtohen ato sipërfaqe që janë tokë në bregdet, rërë, dhe që në mënyrë abuzive janë ndarë nga ish komisionet e ndarjes së tokës, apo dhe që kanë falsifikuar dokumentet, teksa në komision është propozuar që sipërfaqe e tokave që do të mbesin të lira nga verifikimi do ti kalojnë për kompensimin e ish-pronarëve.
