Protesta kundër shembjes së Teatrit Kombëtar është shoqëruar me incidente, një prej të cilave ishte edhe hedhja e kapsollave, prej të cilave u lënduan gazetarja Soni Osmanaj dhe një tjetër grua, ende e paidentifikuar.
Ato kanë pësuar djegie në trup si pasojë e shpërthimit, megjithatë janë jashtë rrezikut për jetën.
Së fundmi, Policia arrestoi 49-vjeçarin e identifikuar si Arben Qyrani, me banim tek Unaza e Re në Tiranë, i cili kishte hedhur lëndët piroteknike.
Më pas, i ndihmuar nga persona të tjerë, Qyrani doli nga turma por u ndalua pak metra larg vendit ku po mbahej protesta nga agjentët e Policisë.
Në njoftimin zyrtar, Policia gjithashtu bën me dije se Qyrani ka qënë i proceduar edhe më parë në vitin 2018 për “tubim të paligjshëm” tek zona e Astirit.
NJOFTIMI I PLOTË:
Policia e Shtetit ka identifikuar dhe ndaluar 49-vjeçarin Arben Qyrani, me banim tek Unaza e Re, Tiranë, autori i hedhjes së lëndëve pirotenike në tubimin e sotëm. Për pasojë pati 2 shtetase të lënduara, nga lënda plasëse, jashtë rrezikut për jetën. Pasi hodhi lëndët piroteknike mes turmës, i ndihmuar nga persona të tjerë, të identifikuar tashmë nga Policia, ai doli nga turma. Agjentët e policisë e ndoqën dhe e ndaluan pak metra larg sheshit ku opozita mbante tubimin.
Qyrani është i proceduar edhe më herët për “Tubim të paligjshëm” në vitin 2018, në zonën e Unazës së Re, në Tiranë.
