Miliarderi dhe aleati për një kohë të gjatë i Donald Trump, Thomas J Barrack është arrestuar në Los Anxhelos me akuzën se ka punuar si agjent për një qeveri të huaj. Ai njihet si themelues i firmës së investimeve Colony Capital, prej së cilës dha dorëheqjen si shef ekzekutiv në vitin 2020. Gjatë vitit 2016, 74-vjeçari shërbeu si këshilltar kryesor i fushatës së ish-presidentit amerikan dhe u konsiderua një mbledhës i fondeve.
BBC shkruan se Barrack akuzohet për lobim të paligjshëm në emër të Emirateve të Bashkuara Arabe gjatë dhe pas fushatës. Ndërkohë, një zëdhënës i tij tha se Barrack planifikon të deklarohet i pafajshëm.
Ai është ish zyrtari i fundit i Trump që përballet me akuza federale. Barrack është akuzuar për komplot, pengim të drejtësisë dhe bërje të deklaratave të shumta të rreme në FBI gjatë një interviste në 2019.
Gjithashtu të akuzuar janë Mattheë Grimes, i cili punon për Barrack -dhe shtetasi i Emirateve të Bashkuara Arabe, Rashid Sultan Rashid Al Malik Alshahhi, 43 vjeç, sipas aktakuzës me shtatë faqe. Të tre ata akuzohen se kanë kërkuar të përparojnë interesat e qeverisë së Emirateve të Bashkuara Arabe si duke ndikuar në zyrtarët Trump dhe përmes paraqitjeve në media. Ndërsa Barrack dhe Grimes u arrestuan të dy në Kaliforni të martën në mëngjes, Alshahhi mbetet i lirë.
