“Ju bëj apel nënave shqiptare të shkojnë dhe të bëjnë rregullisht kontrolle tek mjekët”, apeli është bërë nga Ela, një grua e varfër nga Lezha, e cila po përballet me situatën më të rëndë të jetës së saj që kur zbuloi se kishte tumor në gji.
Në momentin që ajo e zbuloi, përballja me realitetin ishte tepër e vështirë për shkak të kushteve ekonomike.
“Jam njeri fukara. Vetëm qaja kur mora vesh. Jam me 90 mijë lekë në muaj, me një djalë jetim”, tregon Ela situatën e saj, gjatë një reportazhi në TCH.
Ela vijon sërish terapitë, sigurisht mes vështirësive të mëdha. Si të mos mjaftonte sëmundja dhe varfëria, shtëpia e saj u dëmtua nga tërmeti dhe që prej asaj dite ajo jeton në shtëpinë e vajzës së saj.
“Me kanë dhënë vetëm një milion lekë për shtëpinë e dëmtuar nga tërmeti. Se si do ta ndërtoj shtëpinë me kaq lekë nuk e di”, tregon Ela.
Tashmë asaj i kanë mbetur dhe pak terapi dhe me besim dhe shpresë po ia del në luftën kundër kësaj sëmundjeje.
/GazetaReforma.com/
