Në studion e emisionit “Me zemër të hapur” në News24 ka qenë sot nëna e Anxhelina Petros, 28-vjeçares që u vra dhe masakrua nga babai i saj në Greqi, i cili e varrosi më pas në oborr ku e gjeti qeni.Ngjarja e rëndë që ndodhi disa javë më parë në Korfuz ka bërë jehonë në media.
Nëna e viktimës, Xhezmije Hoxhallari hapi dyert e mortit në banesën e saj të rrënuar në lagjen “Donika Kastrioti”, ku ajo jeton me bashkëshortin dhe vajzën e tij 18-vjeçe, Klean, të cilën e ka gjetur 1-vjeçe dhe e ka rritur vetë, duke mos e ndarë asnjëherë nga vajza e saj, Anxhelina.
Xhezmija ka treguar mes lotëve se ka 12 vite që nuk e shikon vajzën me sy, pasi në moshën 16-vjeçare vajza u largua në Greqi për të jetuar me të atin, Aleko Petron. Largimi i saj në Greqi ishte bërë për një jetë më të mirë për vajzën, me pëlqimin e të dy prindërve.
“Kur e mora vesh lajmin erdhi një shoqja ime me burrin që më morën me makinë. Nuk më shkonte në mendje kurrë. Nuk e imagjinoja. Pastaj më tha shoqja që do bëhesh e fortë se Anxhelina ka bërë aksident me makinë dhe është në gjendje të rëndë. Kur shkuam brenda në shtëpi, më tha që Anxhelina është vrarë dhe më pas kam ulëritur ‘çfarë po bëhet”- tregoi nëna për mënyrën se si e mori lajmin.
Ajo tha se ditën tjetër pasi mori lajmin u nis menjëherë në Greqi për të marrë trupin e Anxhelinës.
“Nuk po më mbante vendi për vajzën. Kam djalin e vëllait në Rodos dhe mbesat jashtë, më thanë nisu. Me ndihmën e tyre e mora. I falënderoj shumë, kush mori pjesë dhe e ndjeu për vajzën time. (qan). Kur vinte nga Greqia, shkoja nëpër sokakë si ai zogu që kërkon folenë, por ma fshihnin vajzën. Më thoshin iku, ndenji dy ditë e iku”- tha nëna mes lotësh.
