Analisti Genc Burimi, i pyetur mbi debatet e brendshme në Partinë Demokratike, deklaroi se vëmendja publike duhet të fokusohet tek çështjet që prekin drejtpërdrejt taksapaguesit shqiptarë dhe jo tek polemikat politike. Ai theksoi se aktualisht tre zhvillime të rëndësishme po kalojnë pa transparencën e duhur.
Në studion e “Ora News”, Burimi kritikoi mënyrën si qeveria po menaxhon procesin e paqes fiskale. Sipas tij, deputetja e opozitës Jorida Tabaku i ka kërkuar ministrit të Financave listën e plotë të kompanive që përfitojnë faljen e gjobave, por ministri ka refuzuar ta bëjë publike. “Kryesorja është ajo skemë surrealiste në Parlament, kur zonja Tabaku kërkon emrat dhe ai nuk i jep. Askush nuk komenton ku shkojnë paratë e juaja”, u shpreh ai, duke shtuar se mungesa e transparencës në këtë proces është shqetësuese.
Si çështje të dytë, Burimi ndaloi te taksa e re mbi ndërtimin, e cila sipas tij pritet të vendoset për të financuar mjedisin. Duke iu referuar reportazhit të transmetuar në studio, ai paralajmëroi se kjo masë do të ndikojë sërish në rritjen e çmimeve: “Mësova që do të ketë një taksë të re mbi ndërtimin. Pra, çmimet do të rriten prapë.”
Pika e tretë që ngriti analisti lidhet me qendrat për emigrantët. Ai tha se në Shqipëri pritet të hapen edhe 20 qendra të tjera, një vendim që sipas tij po merret pa debat publik dhe pa transparencë mbi kostot apo ndikimin e këtyre strukturave. “Këto tema i shpall dhe i miraton qeveria, jo opozita”, nënvizoi Burimi.
Ai shtoi se shqiptarët nuk duhet të shpërqendrohen me debatet e brendshme të PD, por të kërkojnë llogari për politikat që prekin taksat dhe financat publike. “Në Perëndim, mediat i kushtojnë prioritet politikave publike që influencojnë te taksat dhe jo jetës së brendshme të partive politike”, u shpreh ai, duke theksuar se edhe në Shqipëri vëmendja duhet të përqendrohet tek vendimet që prekin drejtpërdrejt qytetarët.
