Drejtori i Teatrit Kombëtar, Altin Basha, është shkarkuar nga detyra pas një investigimi të emisionit “Piranjat”, që nxori në pah abuzimet me fondet publike të këtij institucioni.
Basha e ktheu institucionin në një sipërmarrje private, ku 47% e kalendarit u përdor për prodhime të tij dhe bashkëshortes. Vetëm 23% e kohës iu la trupës së teatrit, për të cilët qytetarët paguajnë taksa.
12 milionë lekë për kostume në shfaqjen “Vojçek”, ku Iliriana Basha ishte kostumografe. Një pardesy që kushtonte 200 mijë lekë u faturua për 500 mijë. Fustane për aktore me 270 mijë lekë copa.
Një skemë korrupsioni, duke përfshirë faturimin e pajisjeve të mbivlerësuara dhe punësimin e njerëzve nga rrethi personal i Bashës me paga të larta.
Basha, dikur një protestues kundër shembjes së Teatrit Kombëtar, u bë pjesë e projektit të shkatërrimit të tij, duke e mbështetur shembjen e godinës historike dhe ndarjen e truallit për ndërtimin e kullave nga Shkëlqim Fusha.
Kritikat për Bashën dhe bashkëshorten e tij janë shprehur nga aktorët e teatrit, të cilët e quajnë një “maskaradë të korrupsionit”, ku të gjithë ata që dikur ishin kundër sistemit, tani janë pjesë e tij, duke abuzuar me fonde dhe duke shfrytëzuar pozitat për përfitime personale.
Kjo histori është një pasqyrim i asaj që ndodh në Shqipëri, ku korrupsioni është i përhapur dhe ata që tradhtojnë shpërblehen, ndërkohë që qytetarët dhe kultura paguajnë çmimin.
