Teksa lajme të mira vijnë nga Azia, ku Kina dhe Korea e Jugut po i rikthehen normalitetit, duke dalë fitimtare në luftën kundër Coronavirusit, duket se Europa është larg festës.
E sidomos Italia, ku situata po rëndohet dita-ditës, teksa mbrëmjen e djeshme kryeministri italian në një konferencë për shtyp ka bërë me dije se vendi fqinj do të jetë i gjithi një karantinë, duke ndaluar çdo lëvizje të italianëve.
Italia në karantinë, ndërpriten udhëtimet dhe fluturimet me shtetin fqinj
Por, edhe sot situata është rënduar pasi Zyra italiane e Mbrojtjes ka lajmëruar se ka shkuar në 631 numri i viktimave dhe 10,149 numri i personave të infektuarve.
877 të infektuar po kurohen në terapi intesive, 5038 në struktura spitalore e 2599 në kushte shtëpie, teksa Rajoni i Lombardisë vazhdon të shfaqet më shqetësues me 5791 të infektuar e 468 viktima.
Në rajonin e Lazios ku gjendet kryeqyteti Romë numri i të infektuarve është 116 e janë regjistruar 6 viktima, ndërsa rajoni më pak i prekur mbetet rajoni Bazilikatës me 7 pacientë e asnjë viktimë.
Në rang global, COVID-19 ka trokitur në 115 shtete duke shënuar 4,346 viktima dhe 118,002 të infektuar deri në këto momente.
Në vendin tonë, janë 10 të infektuar dhe deri tani nuk është raportuar për ndonjë rast të ri, teksa sipas ministres Manastirliu janë testuar 114 persona.
Ju rikujtojmë se nëse keni histori udhëtimi në Itali dhe shfaqni simptoma, të tilla si ethe, temperaturë apo kollë e thatë, telefonin në numrin 127 të vendosur në dispozicion nga Ministria e Shëndetësisë.
