Vrasja e komisarit Artan Cuku është një nga krimet më të rënda të viteve të fundit.
Porositësi dhe ekzekutuesi vijojnë të shijojnë lirinë e tyre, shkruan ‘Faxweb’.
Ditën e sotme seanca ndaj Bledar Jambellit dhe Kristaq Lecit te Krimet e Rënda, është shtyrë sërish.
Mësohet se këto dy persona janë lënë të lirë nga gjykata greke, edhe pse ndaj tyre kishte urdhër ndalimi në Shqipëri.
Që pas lirimit, nuk ka asnjë të dhënë për vendodhjen e tyre, kur ndërkohë duhet të jepnin llogari para drejtësisë për krimin e kryer.
Në seancën e zhvilluar te Krimet e Rënda është konfirmuar se Kristaq Leci është liruar pak javë më parë, ndërsa autoritetet greke kanë refuzuar ekstradimin e tyre, me justifikimin se u rrezikohet jeta.
Jambelli ndër të tjera është pjesë e minoritetit grek dhe ka shpëtuar nga akuza e vrasjes në bashkëpunim
Në burg për këtë krim ka përfunduar vetëm kushëriri i Jambellit, Mikel Shallari, i cili ka pranuar ekzekutimin dhe ka bashkëpunuar me drejtësinë.
Gjyqi për vrasjen e Cukut ka nisur pas një viti pezulli, për shkak se të pandehurit nuk kishin marrë njoftim.
Sipas ligjit shqiptar, gjykimi mund të rinisë edhe nëse autorët nuk janë kapur.
