Një aksident u regjistrua këtë të diel në autostradën Rrogozhinë-Lushnje pranë mbikalimit të fshatit Zhamë. Një mjet tip ‘Volkswagen’, i marrë me qira, në të cilin udhëtonin dy turistë polakë ka goditur nga pas një automjet tip “Renault”. Si pasojë e goditjes kanë mbetur të plagosur dy turistët dhe drejtuesi i mjetit dhe që të tre janë transportuar me urgjencë në spitalin e Lushnjës. Të lënduarit janë nën kujdesin e mjekëve dhe janë jashtë rrezikut për jetën. Si rezultat i përplasjes janë krijuar radhë të gjata.
Grupi hetimor në vendngjarje po dokumenton ngjarjen. Nga të dhënat paraprake mendohet se shkak i aksidentit ka qenë shpejtësia e lartë me të cilën lëviznin shtetasit polakë dhe lagështia në rrugë.
Ndërkohë pak minuta më herët, një tjetër aksident u regjistrua në qytetin e Ballshit në Mallakastër. Aksidenti ka ndodhur në lagjen “5 Shkurti” të qytetit të Ballshit, ku rreth orës 12:20, një automjet ka dalë nga rruga dhe si pasojë ka përfunduar në një përrua. Fatmirësisht personat që udhëtonin në automjet nuk kanë pësuar lëndime.
