Një aksident ka ndodhur në Elbasan gjatë ditës së sotme. Një makinë ka dalë nga rruga në fshatin Shelcan duke përfunduar brenda oborrit të një shtëpie. Paraprakisht dyshohet se makina ka rënë një pjesë të lartë rruge duke përfunduar në oborrin e shtëpisë.
Nga informacionet e deritanishme nuk raportohet për viktima, por të paktën 5 persona kanë mbetur të plagosur. Dy prej personave mësohet se janë në gjendje të rëndë.
Një 70-vjeçar që ishte ulur në vendin e pasagjerit, në krah të shoferit ka marrë dëmtime të rënda, po ashtu edhe një i plagosur tjetër.
Nuk dihen ende shkaqet e sakta të aksidentit, por paraprakisht dyshohet se shoferi ka harruar të aktivizojë systemin e frenave të dorës në momentin që kishte parkuar dhe për shkak të terrenit të pjerrët makina është rrokullisur duke përfunduar në oborrin e shtëpisë.
Ndërkohë, personat e plagosur janë transportuar drejt spitalit, ndërsa më shumë detaje nuk janë bërë të ditura. Për ngjarjen në fjalë pritet ende njoftimi i policisë.
Kujtojmë që ditët e fundit aksidentet në vend kanë qenë të shumta. Në 25 qershor një aksident i rëndë ndodhi në rrugën Levan-Vlorë, ku humbën jetën katër anëtarët e familjes Gushi, mes tyre dy vajzat e mitura. Shkak për aksidentin u bë përplasja nga një mjet “Audi” që po vinte pas tyre dhe ishte me shpejtësi tej normave të lejuara.
