Një aksident i rëndë ka ndodhur në aksin rrugor Palasë–Dhërmi, ku një automjet tip “Benz” ka humbur kontrollin dhe është përplasur me barrierat mbrojtëse të rrugës.
Përplasja ka rezultuar fatale për një pasagjer të mitur, vetëm 9 vjeç, i cili ka humbur jetën në vendin e ngjarjes.
Në automjet ndodheshin edhe dy persona të tjerë: drejtuesi i mjetit, 36-vjeçari M.K. nga Librazhdi, dhe një pasagjer 20-vjeçar.
Të dy kanë pësuar lëndime të lehta dhe janë transportuar për ndihmë mjekësore, fillimisht në Spitalin Rajonal të Vlorës, ndërsa i riu 20-vjeçar më pas është dërguar në Spitalin e Traumës në Tiranë. Ata ndodhen jashtë rrezikut për jetën.
Policia ka konfirmuar se drejtuesi i mjetit ishte në gjendje të dehur në momentin e aksidentit, çka dyshohet të ketë qenë shkaku kryesor i humbjes së kontrollit.
Ai është arrestuar nga policia, ndërkohë që grupi hetimor ndodhet në vendngjarje dhe po punon për zbardhjen e plotë të rrethanave.
Njoftimi i policisë
“Specialistët e Seksionit të Trafikut Urban dhe Interurban në DVP Vlorë arrestuan në flagrancë, për veprën penale “Drejtimi i automjeteve në mënyrë të parregullt”, shtetasin M. K., 36 vjeç, banues në Librazhd, pasi më datë 24.07.2025, rreth orës 23:10, në aksin rrugor Palasë–Dhërmi, duke drejtuar automjetin në gjendje të dehur, dyshohet se ka humbur kontrollin mbi drejtimin e mjetit dhe është përplasur me bordurën anësore të rrugës. Si pasojë e aksidentit, ka humbur jetën në vendngjarje njëri prej pasagjerëve, një i mitur 9 vjeç. Gjithashtu, është dëmtuar pasagjeri tjetër, shtetasi E. A., 20 vjeç, i cili ndodhet në Spitalin e Traumës, nën kujdesin e mjekëve”.
