Pëllumb Petritaj është dënuar sërish për falsifikim dokumentash dhe tjetërsim pronash në bregdetin e Vlorës.
Gjykatësi Skënder Haluci ka vendosur për të 5.4 vite burg, shkruan “Shqiptarja.com”.
Prokurori i kësaj çështje ka qenë Albert Kuliçaj, të cilit iu vendos një sasi tritoli në makinën e tij më 21 dhjetor të vitit të kaluar.
Ky është dënimi i dytë për Petritajn, pasi në prill të 2018-ës, biznesmeni është dënuar me 3 vite burg nga Gjykata e Vlorës për tjetërsim pronash në bregdetin e Zvërnecit.
Petritaj akuzohet nga Prokuroria e Vlorës, për falsifikimin e një vendimi gjyqësor të datës 4 maj 1996, i cili përcaktoi se prona e të ndjerit Seit Shehu, përcakton si trashëgimtarë ligjorë të radhës Kutbi Shehun, Ramis Shehun dhe Merjeme Shehun.
Bëhet fjalë për një sipërfaqje toke rreth 32 mijë metra katrorë, që ndodhet në zonën e “Ujit të ftohtë” në Vlorë.
Prokurori Kuliçaj kërkoi 8 vite burg për Petritajn, vendim i cili u miratua edhe nga gjyqtari Skënder Haluci, për “Falsifikim dokumentash” dhe “Pastrim i produkteve të veprës penale”.
Mirëpo për shkak se Petritaj e kishte filluar procesin me gjykim të shkurtuar, dënimi i zbriti në 5.4 vite burg.
Petritaj aktualisht ka një proces gjyqësor të hapur për abuzimet me pronat në Zvërnec, ku po i njëjti prokuror ka kërkuar 20 vite burg për të.
