Edhe pse kanë javë që kërkojnë projektin e zgjerimit të landfillit, banorët e Sharrës akoma nuk janë shpronësuar nga shteti për tokën që u ka marrë Inceneratori i Tiranës. Këtë të martë ata u drejtuan pranë zyrave të landfillit, për të takuar drejtuesit e kompanisë, por nuk arritën të futen aty.
“Momentin që ne erdhëm këtu njoftuan rojen që të mbyllë portën. Nuk japin asnjë lloj shpjegimi, ne vijmë këtu për të kërkuar projektin, ku do shkojë projekti, ku do ndalojë”, banorët thonë se me zgjerimin e landfillit, jo vetëm që kanë humbur tokat e tyre, por edhe puset dhe burimin e ujit duke i detyruar ta blejnë ujin.
“Kanë marrë ujin në radhë të parë, ja ku janë puset atje, kanë marrë tokat as nuk na kanë shpërblyer asgjë. Ne na kanë vënë thjeshtë rrjetën, mos kaloni më në tokë. Nuk e marrim vesh, kur të vijnë vetë se ne nuk dimë gjë”, shprehen banorët e Sharrës.
Sipas tyre, kryebashkiaku Erion Veliaj bën propagandë për të paraqitur të vërtetën ndryshe.
“ Z.Veliaj nuk na ka kushtuar dhe as nuk do na kushtojë ndonjëherë vëmendje. Ai vetëm ka futur firmën me koncencion aty dhe firma vazhdon punë”, tha një qytetare, që priste para derës së inceneratorit.
Vendimi
Sipas një VKM-je të botuar në Fletoren Zyrtare më 14 janar 2019, qeveria vendosi të shpronësonte tokat e banorëve të Sharrës për llogari të koncesionit të trajtimit të mbetjeve për 448 lekë/metri, duke vendosur në dispozicion një fond prej 284.9 milionë lekë ose rreth 2.3 milionë euro.
Banorët i kundërshtuan shpronësimet dhe u ngritën në protesta në maj 2019, por nuk mundën të ndalnin avancimin e fadromave drejt tokave të tyre.
Të papërfillur, dhjetëra familje të shpronësuara iu drejtuan Gjykatës Administrative të Tiranës me padi kundër qeverisë dhe Bashkisë së Tiranës – dhe disa prej tyre kanë dalë tashmë fitues.
Vendimet e gjykatës i rrisin ndjeshëm kostot e shumëdebatuara të inceneratorit të Tiranës, që edhe pa shpronësimet parashikohet t’u kushtojë taksapaguesve rreth 330 milionë euro në tri dekadat e ardhshme.
Të dhënat e siguruara nga BIRN tregojnë se vetëm nga 4 çështje të fituara në shkallë të parë, fatura shtesë nga shpronësimet është 211 milionë lekë ose 74% e fondit total të përcaktuar nga qeveria për banorët e Sharrës –ndërsa mbulon më pak se 1/10 e pronës së shpronësuar.
/GazetaReforma.com/
