Çdo vit, më 7 prill, shënohet Dita Botërore e Shëndetit, e cila përkon me themelimin e Organizatës Botërore të Shëndetësisë në vitin 1948.
Kjo ditë ka një rëndësi të veçantë pasi shërben si një moment për reflektim dhe ndërgjegjësim për çështjet që prekin shëndetin publik globalisht.
OBSH çdo vit zgjedh një temë të veçantë për të adresuar probleme të shëndetit dhe mirëqenies, duke theksuar jo vetëm sëmundjet fizike dhe mendore, por edhe rëndësinë e barazisë në aksesin ndaj kujdesit shëndetësor, parandalimin e sëmundjeve dhe promovimin e një jetese të shëndetshme.
Dita Botërore e Shëndetit është një thirrje për individë, komunitete dhe qeveri për të siguruar që kujdesi shëndetësor të jetë i aksesueshëm për të gjithë, pa dallime. Në një botë ku ende ekzistojnë pabarazi të theksuara në shëndet, kjo ditë kujton se shëndeti është një e drejtë themelore dhe jo një privilegj.
Shënimi i Ditës Botërore të Shëndetit këtë vit do të nisë me një fushatë njëvjeçare për shëndetin e nënës dhe të porsalindurve, e titulluar “Fillime të Shëndetshme, E Ardhme Shpresëdhënëse”.
Fushata do të nxisë qeveritë dhe komunitetin e shëndetësisë të rrisin përpjekjet për t’i dhënë fund vdekjeve të parandalueshme të nënave dhe të porsalindurve.
Sipas të dhënave të OBSH, çdo vit rreth 300,000 gra humbasin jetën nga komplikime të lidhura me shtatzëninë dhe lindjen, ndërsa mbi 2 milionë foshnja vdesin gjatë muajit të parë të jetës.
Po ashtu, rreth 2 milionë të tjerë lindin të vdekur. Pavarësisht përpjekjeve, katër nga pesë vende nuk janë në rrugën e duhur për të arritur objektivat e përmirësimit të mbijetesës së nënës deri në vitin 2030.
Në këtë kontekst, OBSH thekson rëndësinë e zhvillimit të sistemeve shëndetësore që të adresojnë jo vetëm komplikimet obstetrike, por edhe sëmundjet jo të transmetuara, shëndetin mendor dhe planifikimin familjar.
Gjithashtu, ajo kërkon që gratë dhe familjet të mbështeten nga ligje dhe politika që mbrojnë shëndetin dhe të drejtat e tyre.
Fushatat e këtij viti kanë disa qëllime kryesore:
• Të rrisin ndërgjegjësimin për boshllëqet në mbijetesën e nënës dhe të porsalindurit.
• Të mbështesin investimet që përmirësojnë shëndetin e grave dhe foshnjave.
• Të inkurajojnë veprime kolektive për mbështetje të prindërve dhe profesionistëve të shëndetësisë.
• Të ofrojnë informacione të dobishme mbi shtatzëninë, lindjen dhe periudhën pas lindjes.
Dita Botërore e Shëndetit është një mundësi për informim dhe diskutim mbi çështjet shëndetësore në botë, dhe caktimi i kësaj dite ishte një nga veprimet e para të OBSH për të nënvizuar rëndësinë e shëndetit global.
