Ditën e sotme, policia e Tiranës ka arrestuar Julian Gjokën, i cili mashtronte qytetarët se do t’i punësonte në shtet, duke iu marrë shuma të konsiderueshme parash.
I riu nga Vora, u prangos në kuadër të operacionit policor i koduar “Premtuesi”. 29-vjeçari ka mashtruar dy vajza, duke iu premtuar një vend pune në ministri dhe iu ka marrë këtyre të fundit shuma të konsiderueshme parash, raporton ABC News.
Madje, njërës prej tyre ai i ka kërkuar 7 mijë euro, në këmbim të vendit të punës që siç thoshte do t’ja siguronte tek ministria e Energjitikës. 29-vjeçari deklaronte se kishte të njohur të tij në këtë dikaster, duke ua bërë të sigurt punësimin, por më pas kjo nuk ndodhte.
Ndërkaq, mbi të riun rëndojnë akuzat “Mashtrimi”, “Falsifikimi i dokumenteve” dhe “Ushtrimi i ndikimit të paligjshëm ndaj personave që ushtrojnë funksione publike”.
“–J. Gj., 29 vjeç, banues në Vorë, për veprat penale “Mashtrimi”, “Falsifikimi i dokumenteve” dhe “Ushtrimi i ndikimit të paligjshëm ndaj personave që ushtrojnë funksione publike”.
Ky shtetas dyshohet se me anë të mashtrimit, dokumenteve të falsifikuara dhe ushtrimit të ndikimit të paligjshëm ndaj personave që ushtrojnë funksione publike, ka përfituar shuma të konsiderueshme parash nga shtetaset V. Ç. dhe L. P., të cilave iu kishte premtuar se do t’i punësonte në institucione shtetërore”, thuhet ndër të tjera në njoftimin e Policisë.
