Mesa duket ngjarjet e fundit kriminale të ndodhura në Elbasan kanë ngritur në këmbë Policinë e Shtetit.
Mësohet se këtë mbrëmje FNSH dhe RENEA kanë nisur kontrolle të befasishme në këtë qytet ku brenda 9 ditëve janë vrarë 3 persona. Nga kontrolli i ushtruar nga forcat policore janë shoqëruar disa persona pa mjet identifikimi dhe shumë të tjerë që kanë kundërshtuar autoritetet policore.
Kujtojmë se viktima e parë e atentatve në Elbasan është Emiljano Ramazani, 39 vjeç u ekzekutua më 21 korrik në vendin e quajtur “Rrethrrotullimi i luleve”. Viktima është qëlluar me breshëri plumbash nga një makinë në ecje, që kishte minimumi dy persona brenda.
Ndërkohë më 29 korrik në lagjen “Emin Matraxhiu” në afërsi të varrezave në Elbasan u gjet i masakruar trupi i Regis Runajt 23 vjeçar.Dyshohet se vrasja e ka lidhje me ekzekutimin e Emiljano Ramazanit, të ndodhur më 20 korrik në po të njëjtin qytet pasi mes tyre ka patur lidhje miqësie. Po kështu, dyshimi kryesore për vrasjen e 23-vjeçarit, ngelet prishja e pazareve të drogës, apo konflikteve për ndarjen e territorit ashtu sic ndodhi edhe me ‘Rramanin’.
Më pas në orët e para të mëngjesit, të 30 korrikut pas një sherri banal, humbi jetën Florian Lamçe. Ngjarja ndodhi në një nga lokalet në qendër të Elbasanit. Lamçe para vrasjes po pinte me shokët e tij, Adriano Hajdari dhe Sokol Sanxhaktari, i cili është edhe dhëndri i ish-kryebashkuakut, Qazim Sejdini. Këta të fundit janë arrestuar nga policia për vrasjen e Lamçes dhe akuza iu komunikua disa orës pas shoqërimit, për shkak se ishin të dehur.
