Kur kanë mbetur dhe tre muaj nga zhvillimi i Samitit të Zagrebit në maj, ku do diskutohet rreth negociatave të BE me Shqipërinë, duket se qëndrimet pozitive pro çeljes po shtohen.
Së fundmi, ish-kryeministri grek dhe kryetari i SYRIZA, Aleksis Cipras, ka analizuar domosdoshmërinë e vendimit pro për hapjen e negociatave të BE me Shqipërinë, duke theksuar paralelisht rëndësinë e plotësimit të detyrimeve ndaj minoritetit grek, nga pala shqiptare.
Cipras tha sot në Paris se zgjerimi lejon dhe thellësimin e dy procedurave që kanë ecur bashkarisht historikisht, nga vitet e para të BE-së, kur kishte një vizion aspirant për të ardhmen
“BE nuk mund të ketë rol gjeopolitik ndërkombëtar dinamik nëse nuk aplikon një strategji të besueshme në rajonin e saj, duke mbështetur plotësisht Marrëveshjen e Prespës. Periudha pas ngrirjes së procesit të integrimit të vendeve Ballkanike, në vitin 2014, shkaktoi destabilizim në rajon dhe fuqizimin e fuqive të treta në dëm të BE-së. Duhet shfrytëzuar dinamika e Marrëveshjes së Prespës, që ngjalli një tjetër impakt në Shqipëri dhe në dialogun me Kosovën, ndryshe BE do të përballet me situata shumë më problematike, destabilizimin e rajonit, ndërsa do të shtohen ndjeshëm emigrantët e Ballkanit Perëndimor në Europë.
Kohezioni i BE-së dhe procedurat integruese rezultative amplifikohen me fuqizmin e metodologjisë, sipas propozimeve zyrtare të BE-së, bazuar në vlerat dhe parimet europiane për një Europë më sociale, jo me pezullimin e integrimit. BE duhet të mbështesë liderët dhe popujt e rajonit, sidomos kur janë të gatshëm të marrin vendime të guximshme e të zbatojnë reformat, në rast të kundërt thjesht ofrojmë hapësirë e justifikueshme për nacionalizmin dhe autoritarizmin”, ka deklaruar Cipras.
Në tetor u zhvillua Samiti i Brukselit, por dështoi pasi Macron kërkoi që negociatat të mos hapen duke kërkuar reformim të BE.
Kujtojmë se Komisioneri i BE-së për Zgjerimin dhe Fqinjësinë, Oliver Varhelyi, prezantoi metodologjinë e re të zgjerimit të Komisionit në shkurt, që u prit pozitivisht.
Megjithatë ka patur edhe zyrtarë europian që i kanë përshkruar ndryshimet si thjesht kozmetike, të dizajnuara kryesisht për të kënaqur presidentin francez Emmanuel Macron dhe për ta bindur atë të japë dritën jeshile për hapjen e bisedimeve të pranimit me dy vendet e Ballkanit në muajt e ardhshëm.
