Një shpërthim i fuqishëm ka ndodhur këtë të martë në mëngjes në një fabrikë eksplozivësh në fshatin Kavakli, në provincën e Balikesir, në Turqinë veriperëndimore.
Shpërthimi ka shkaktuar 12 viktima dhe katër të plagosur, sipas autoriteteve lokale. Ministri i Brendshëm, Ali Yerlikaya, njoftoi se është nisur një hetim i thelluar për të zbuluar shkakun e shpërthimit, ndërsa guvernatori i Balikesir, Ismail Ustaoglu, konfirmoi bilancin e viktimave dhe tha:
“Sipas raporteve të para, 12 punonjës kanë humbur jetën dhe katër të tjerë janë dërguar në spital me lëndime. Uroj mëshirën e Zotit për viktimat dhe shërim të shpejtë për të plagosurit.”
Pamjet nga vendi i ngjarjes treguan rrënoja dhe fragmente metali jashtë uzinës, ndërkohë që ambulancat dhe ekipet e emergjencës ishin në terren, ndërsa zjarrfikësit po mundoheshin të shuajnë flakët. Disa pjesë të ndërtesës janë shembur nga shpërthimi.
Ministri Yerlikaya tha se shkaku i shpërthimit mbetet ende i paqartë, por theksoi se mundësia e sabotimit është përjashtuar. “Po punojmë për të zbuluar se çfarë e shkaktoi këtë tragjedi,” shtoi ai.
Shpërthimi ndodhi në një sektor të fabrikës që prodhon municione dhe eksplozivë për tregjet e brendshme dhe ndërkombëtare. Gjendja e të plagosurve është jashtë rrezikut për jetën.
Fabrika është pjesë e industrisë së mbrojtjes turke, një sektor që ka pasur zhvillime të shpejta, veçanërisht në prodhimin e dronëve dhe municioneve.
Presidenti turk, Recep Tayyip Erdogan, ka mbështetur fuqishëm këtë industri, duke kontribuar në shndërrimin e Turqisë në një eksportues të rëndësishëm të produkteve të mbrojtjes.
