Maksim Begaj, Mentor Cuku, Jon Keta, Armando Salla, Alban Kalaja, Julian Marko dhe Erjon Tema, janë shtatë kandidatët, të cilët do të konkurojnë për të qenë numri dy i Byrosë Kombëtare të Hetimit, BKH. Një nga kandidatët do të zërë vendin e Aida Hajnajt, të cilës i ka mbaruar mandati. Emrat janë bërë me dije nga Weblajm. Mes këtyre kandidatëve, Weblajm mëson se tre janë më të kuotuarit për postin e zv.drejtuesit, përkatësisht Erjon Tema, Armando Salla dhe Juliaj Marko. Faza për përzgjedhjen e kandidatit është mbyllur më 8 Korrik.
Si zgjidhet zv.drejtuesi i BKH dhe kompetencat
1. Zëvendësdrejtori është përgjegjës për funksionimin e shërbimeve të Policisë Gjyqësore të Byrosë Kombëtare të Hetimit. Zëvendësdrejtori është përgjegjës për funksionimin e vazhdueshëm të Byrosë Kombëtare të Hetimit gjatë çdo mungese të drejtorit.
2. Zëvendësdrejtori është hetues i Byrosë Kombëtare të Hetimit dhe ka të paktën 3 vjet eksperiencë pune në hetimin e veprave penale të korrupsionit, krimit të organizuar apo krimeve të rënda, si dhe duhet të ketë treguar aftësi drejtuese.
3. Zëvendësdrejtori emërohet nga Drejtori i Byrosë Kombëtare të Hetimit, me pëlqimin e Drejtuesit të Prokurorisë së Posaçme, pas një procesi të hapur dhe transparent të përzgjedhjes, me mandat 4-vjeçar dhe me të drejtë rizgjedhjeje vetëm një herë.
4. Zëvendësdrejtori, pas mbarimit të mandatit, gëzon të drejtën të kthehet në pozicionin e mëparshëm si hetues.
5. Zëvendësdrejtori raporton te Drejtori i Byrosë Kombëtare të Hetimit.
6. Zëvendësdrejtori i Byrosë Kombëtare të Hetimit shkarkohet nga detyra nga Këshilli i Lartë i Prokurorisë, bazuar në rekomandimet e Drejtuesit të Prokurorisë së Posaçme, kur: a) dënohet me vendim të formës së prerë të gjykatës për kryerjen e një vepre penale; b) për shkelje të Kushtetutës apo për shkelje të rëndë të ligjit gjatë kryerjes së detyrës; c) për shkelje të rënda dhe shumë të rënda të disiplinës gjatë ushtrimit të funksioneve; ç) kur dalin fakte të reja që janë verifikuar dhe janë në kundërshtim me kriteret e përcaktuara për emërimin e tij.
7. Këshilli i Lartë i Prokurorisë, bazuar në rekomandimin e përbashkët të Drejtuesit të Prokurorisë së Posaçme dhe Drejtorit të Byrosë Kombëtare të Hetimit, pezullon Zëvendësdrejtorin e Byrosë Kombëtare të Hetimit nëse ai bëhet subjekt i një hetimi penal. Pezullimi vazhdon për aq kohë sa do të ekzistojnë shkaqet e tij.
Hetuesit e BKH sëbashku me zv.drejtuesin e tyre brenda pak javësh pritet të akomodohen edhe tek ambientet e reja të punës e cila është godina e re përballë Prokurorisë së Posaçme Kundër Korrupsionit dhe Krimit të Organizuar, SPAK.
